Confebask, negoziatzearen alde?

Negoziazio kolektibo sektorialaren egoerari irtenbide bat bilatzeko Euskal Autonomia Erkidegoko patronal handienak, Confebask, lurraldeko lau sindikatu handiei eskua luzatu die. CC.OO eta UGT sindikatuei ondo iruditu zaie proposamena, oinarri on bat dela diote. ELA, aldiz, kritikoa agertu da, proposamenak ez baitu lege baliozkotasunik. LAB euskal esparruari buruz hitz egin du. Dirudienez, akordioa lortzeko, bake-soziala ez da beharrezko baldintza izango, orain arte patronalak exijitu duen bezala. Gainera, EAEko lan hitzarmenak Estatu mailakoen aurrean lehenetsi nahi dute. Urtarrilean berriro batuko dira, ikusteke dago topaketa hauetatik akordiorik lortzen den ala ez.

 

Zenbait sektoretako negoziazio kolektiboa urte asko izoztuta darama. Gure planteamendua tokiko baldintzak hobetzea da, enpresaz enpresa, beti sektoreko edo Estatuko lan hitzarmena hobetzeko nahiaz. Baina badago errealitate bat, askotan errepikatzen dena: sinatzen diren sektoreko akordioak aurrekoak baino okerragoak direla; sindikatu hauek gure lantokietara arrakastak saltzera etortzen dira, atzerapauso bat denean. Sektore esparruan ezin izan badute hitzarmen onik sinatu, gutxienez umiltasuna eskatzen diegu, hori onartzea.

CNTk negoziazio kolektiboari buruzko plataforma adostu du. Honen helburua langileon egoera hobetzea da, ultraaktibitatea berreskuratuz, emakume eta gizonen arteko berdintasun erreala bultzatuz , informazio eta galdeketa eskubideak bermatuz, beste elementuen artean. CNTren sail sindikalak hau ezartzen saiatuko dira, baina proposamen honen aurrean beste erakunde sindikalek zer aukeratuko dute?

Patronalak egindako eskaeraren aurrean, guk beste sindikatuei geurea luzatzen diegu. Zein aldean kokatzen diren, euren erantzukizuna izango da.